„Fyrirvarinn er alveg út úr kortinu“

„Fyrirvarinn er alveg út úr kortinu,“ segir Árni Gunnarsson formaður Samtaka ferðaþjónustunnar um ákvörðun Landeigendafélags Geysis að hefja gjaldtöku inn á hverasvæðið í Haukadal í næsta mánuði.

Árni segir aukinn kostnað lenda á aðilum í ferðaþjónstu: „Þó svo að landeigendur hafi sagst ætla að hefja gjaldtöku voru þeir ekki búnir að tiltaka hvenær hún hæfist og hver upphæðin yrði. Nú er það þannig að flestir aðilar í ferðaþjónustu eru búnir að birta verðskrár og jafnvel selja ferðir til landsins. Þeir munu ekki geta hækkað verðið á ferðum sínum og því lendir þessi aukni kostnaður beint á aðilum í ferðaþjónustu.

Hann vonast til þess að landeigendur Geysissvæðisins endurskoði ákvörðunina og taki þátt í þeirri vinnu sem nú fer fram í kringum náttúrupassann, svokallaða. „Við hefðum viljað sjá – því landið er í stórum hluta í eigu ríkisins – að félagið tæki þátt í vinnunni í kringum náttúrupassann og að uppbygging svæðisins og upplýsingagjöf til ferðamanna yrði fjármögnuð með innkomu sem hlytist af náttúrupassanum,“ segir Árni ennfremur.