Öryggisskáp með lyfjum stolið

Óprúttinn aðili fór inn í mannlausa íbúð í Reykjanesbæ síðdegis síðastliðinn föstudag og hafði á brott með sér öryggisskáp, sem húsráðandi geymdi lyf sín í.

Húsráðandinn greindi lögreglunni á Suðurnesjum frá því að hann hefði skotist út í búð, sem er í næsta húsi, og skilið íbúðina eftir ólæsta á meðan. Þegar hann kom til baka, að tíu mínútum liðnum, sá hann að fataskápur í forstofu stóð opinn og öryggisskápurinn var horfinn.

Í skápnum var talsvert magn lyfja, þar á meðal sterk verkjalyf, því húsráðandi var nýlega búinn að setja nýja lyfjaskammta í skápinn. Lyfin voru dýri verði keypt að því er fram kemur í tilkynningu frá Lögreglustjóranum á Suðurnesjum.