Risalanga hjá Fiskikónginum

Kristján Berg, aka Fiskikóngurinn sjálfur, fékk á borð sitt sannkallaða risalöngu. „Stærsta langa sem ég hef á ævinni séð.  Langan vigtaði 31 kg.  hún var veidd á línu, laugardaginn 8. febrúar, af bátnum Beta VE 36, og landað á Hornafirði,“ segir Fiskikóngurinn.

Það segir sína söguna að þetta sé stærsta langa sem Fiskikóngurinn hefur séð: „Ég hef séð þær margar. Við erum að kaup 150 tonn af löngu á ári. Og ég hef verið í þessu lengi. Að þetta sé stærsta langa sem ég hef séð segir sína söguna. Ég hef ekki heyrt af þeim stærri en það getur vel verið að þær séu til. Þetta er tveggja manna tak að flaka svona, maður hendir þessu ekkert upp með vinstri og flakar með hægri. Það þarf fjóra sterka handleggi í það.“

Fiskikóngurinn kaupir fisk daglega á uppboði, sem kemur svo til hans í búðina eldsnemma morguns. Þessi langa var í karinu sem honum barst. „Þrjár svona risastórar löngur. Þessi var stærst sem ég tók og vigtaði.“

Fiskikóngurinn segir Íslendinga heldur vilja stærri fiska en minni þó hann geri ekki upp á milli þeirra sjálfur sé litið til gæða. „Mér finnst þetta oft fallegri steikur sem koma af stórum fiskum, verður svona í flögum kjötið og girnilegra. Oftast selst meira af stærri fiski. En, kannski ekki svona megastórt. Það er lítill bragðmunur; smærri fiskur getur reyndar verið meira djúsí og sætari. Þetta er spurning um að elda hann rétt.“