Úrkoma ekki meiri í 17 ár

Úrkoma í Breiðdalsvík hefur ekki mælst meiri í 17 ár og hafa einungis tveir dagar á þessu ári verið úrkomulausir.

Helga Pálína Harðardóttir, veðurathugunarmaður og bóndi á Gilsá í Breiðdal, mælir úrkomuna daglega.  Mælingarnar eru 17 km frá Breiðdalsvík og inn í Norðurdal og hefur hún séð um mælingar á þessu svæði frá árinu 1997. 



„Úrkoman í janúarmánuði hefur ekki verið meiri síðan árið 1997. Janúarmánuður einkenndist af miklu myrkri, rigningu og slyddu og mældist úrkoman 573,9 mm. Það er um þriðjungur af ársúrkomu síðasta árs,“ segir Helga.

Ársúrkoma síðasta árs var 1424 mm og árið 2012 mældist úrkoman 1180 mm.  Útlit er fyrir frekari úrkomu út alla þessa viku.

„Spáin hefur ekki staðist í dag og ég veit ekki hvort hún geri það á morgun, en enn sem komið er er úrkomulaust.“