Skipar formenn fagráða í siglinga- og fjarskiptamálum

Innanríkisráðherra hefur skipað Jarþrúði Ásmundsdóttur formann fagráðs um fjarskiptamál til næstu tveggja ára og Sigrúnu Lilju Guðbjartsdóttur formann fagráðs um siglingamál. Þetta kemur fram á vefsíðu Innanríkisráðuneytisins.

Fagráðin eru skipuð annars vegar í samræmi við lög um fjarskiptamál og hins vegar lög um Samgöngustofu, stjórnsýslustofnun samgöngumála.

Meðal helstu hlutverka fagráðs um fjarskiptamál er að fjalla um stefnumótun í fjarskiptamálum og lagafrumvörp á því sviði.

Í fagráði um fjarskiptamál eiga sæti fulltrúar Samtaka atvinnulífsins sem tilnefna þrjá fulltrúa, fulltrúi Sambands íslenskra sveitarfélaga og Neytendasamtakanna.

Hlutverk fagráðs um siglingamál er að vera ráðherra til ráðuneytis um siglinga- og vitamál. Í fagráðinu eiga sæti fulltrúar frá helstu sjómannasamtökum og hagsmunaaðilum í sjávarútvegi og siglingum.