Dæmdar skaðabætur eftir að hafa klemmst undir vinnupalli

Ungum dreng voru í héraðsdómi Reykjavíkur í dag dæmdar fullar bætur úr ábyrgðartryggingu vinnuveitanda fyrir vinnuslys eftir að hann klemmdist milli hæða á vinnupalli sem hrundi ofan á hann.

Drengurinn var við vinnu á Selfossi þann 30. júlí 2007, en hann var 16 ára þegar atvikið átti sér stað. Hann var ásamt tveimur öðrum drengjum að taka vinnupallinn niður þegar hann féll skyndilega saman ofan á drenginn. Stefnandi var bæði tryggður kjarasamningsbundinni slysatryggingu auk þess sem vinnuveitandi hans hafði ábyrgðartryggingu hjá Vátryggingafélagi Íslands.

Drengurinn slasaðist á mjóbaki og hlaut 5% varanlega örorku. VÍS greiddi honum eftir slysið 1.369.236 krónur, en ágreiningurinn snerist um það hvort tryggingafélaginu hefði verið heimilt að draga frá bótunum 426.117 krónur fyrir varanlega örorku, en það taldi drenginn ekki eiga rétt á bótum samkvæmt ábyrgðartryggingu vinnuveitanda. Drengurinn taldi hins vegar að hann hefði átt rétt á fullu bótum að fjárhæð 1.795.353 krónur.

Dómurinn komst að þeirri niðurstöðu að drengurinn hafi átt rétt á bótum úr ábyrgðartryggingu vinnuveitandans og gerði tryggingafélaginu að greiða honum þær bætur, með dráttarvöxtum, sem félagið hafði dregið frá upphaflegri bótagreiðslu.