Glitrandi draumar á Vetrarhátíð

Glitrandi draumar er ljósalistaverk eftir leikskólabörnin á Drafnarsteini. Tréð á Bláa róló var í aðalhlutverki í dag en listamennirnir skreyttu það með glitrandi hugmyndum sínum og draumum. Ljósgeislar frá upplýstu trénu endurvörpuðu draumum listamannanna upp í himininn og dreifðu þeim um allan heim til annarra barna.

Tendrun trésins fór fram á horni Túngötu og Bræðraborgarstígs í morgun, þriðjudag 11. febrúar, kl. 9:00. Að lokinni tendrun sungu börnin eitt lag áður en þau héldu aftur heim á Drafnarstein.

Ljósaverkið Glitrandi draumur var meðal hugmynda verkefnisins Betra hverfi 2014 sem er samráðsverkefni íbúa og stjórnsýslu Reykjavíkurborgar

Vetrarhátíð er í fullum gangi og af nógu er að taka á þessum dimmu vetrardögum þar sem magnað myrkur fær að njóta sín í Reykjavík. Ljósaverk Vetrarhátíðar lýsa upp fegurð borgarinnar á skemmtilegan máta en verkin eru tendruð frá klukkan sjö til miðnættis öll kvöld til 15. febrúar.