"Allir ættu að læra táknmál"

Dagur íslenska táknmálsins haldinn hátíðlegur með fjölbreyttri dagskrá í dag. Meðal annars héldu starfsmenn Samskiptamiðstöðvar heyrnalausra og heyrnaskertra stutt námskeið fyrir börnin á leikskólanum Sólborg þar sem tilfinningar á táknmáli voru í aðalhlutverki.

„Það eru ekki sérlega margir Íslendingar sem tala eingöngu táknmál, ætli það séu ekki um 250 manns," segir Margrét Gígja Þórðardóttir, kennslustjóri hjá Samskiptamiðstöð heyrnaskertra og heyrnalausra.

„En heyrnaskertir Íslendingar eru miklu fleiri. Það er eiginlega hálf þjóðin því flestir verða heyrnaskertari með aldrinum. Mér finnst að allir heyrnaskertir ættu líka að læra táknmál, þá hafa þeir val um hvort tungumálið sem þeir nota. Mér finnst að allir eigi að læra táknmál."

Óskir til hinna barnanna

Og það var líf og fjör á fleiri leikskólum í dag, en á leikskólanum Drafnarsteini var í morgun afhjúpað ljóslistaverkið Glitrandi draumar. Listamennirnir eru nemendur skólans.

Og tilgangurinn með listsköpuninni var afar fallegur.

„Við vorum að senda óskirnar okkar til hinna barnanna," sagði ein ung stúlka í skólanum í samtali við fréttastofu.

Glitrandi draumar er hluti af dagskrár Vetrarhátíðar í Reykjavík, sem nú er í fullum gangi.

Skiptar skoðanir á gjaldtöku við Geysi

Landeigendur hverasvæðisins við Geysi, sem er einn vinsælasti ferðamannastaður landsins, hafa ákveðið að hefja gjaldtöku frá tíunda mars næstkomandi og munu allir frá sautján ára aldri þurfa að greiða 600 krónur inn á svæðið.

Þegar mest er koma um sex þúsund gestir á Geysissvæðið á hverjum degi og ætti hver þeirra því að skila um 3,6 milljónum.

Fréttamaður spurði gangandi vegfarendur hvort þeir myndu sækja Geysissvæðið heim þrátt fyrir gjaldtökuna. Á því voru skiptar skoðanir, líkt og sjá má í meðfylgjandi myndskeiði.