Sigmundur með frönskum sló í gegn

Sigmundur Davíð Gunnlaugsson forsætisráðherra og Bjarni Benediktsson fjármálaráðherra mættu ekki í hamborgara til veitingamannsins Magnúsar Inga Magnússonar í hádeginu, en þeim var formlega boðið að mæta á veitingastaðinn Texasborgara og þiggja borgara nefnda í höfuðið á þeim sjálfum.

Í samtali við Fólk, kynningarblað sem fylgir Fréttablaðinu í dag, segist Magnús vera orðinn þreyttur á að bíða eftir skuldaleiðréttingunni frá Sigmundi og Bjarna og því hafi hann ákveðið að byrja að bjóða upp á litla og ódýra borgara fyrir fólk í skuldaánauð.

Magnús vildi bjóða þeim félögum upp á Sigmund og Bjarna með frönskum kartöflum og steikja fyrir þá fyrstu borgarana af hvorri tegund. Hvorugur þeirra mætti en Sigmundur lét Magnús þó vita að hann kæmist ekki.

„Já hann sendi mér þau skilaboð að vegna anna kæmist hann ekki en hinn lét ekki heyra í sér,“ segir Magnús í samtali við Vísi og bætir því við að boðið standi enn, þó að nú hafi almenningur fengið að bragða á borgurunum.

„Við byrjuðum í hádeginu og það var góð umferð í þetta. Sigmundur var sérstaklega vinsæll enda er hann hamborgari. Bjarni var ekki jafn vinsæll enda er það nú reynsla mín af fiskborgurum. Þeir eru ekki jafn vinsælir.“

Magnús segist sjálfur hafa kosið Sigmund vegna loforðsins um skuldaleiðréttingu en fólkið sé orðið þreytt. „Ég segi bara eins og Ingvi Hrafn, er hann snákasölumaður eða Houdini?“