Konum fjölgar í Formúlu 1

Simona de Silvestro er gengin til liðs við Sauber. Hún er samningsbundin hjá liðinu og stefnir á að verða ökumaður þess á næstu árum.

Silvestro vantar svokallað ofurleyfi, sem þarf til að mega aka formúlubílum. Liðið ætlar að aðstoða hana við að afla sér leyfisins og undirbúa sig sem best fyrir Formúlu 1.

Hin 25 ára Silvestro hefur keppt í ýmsum flokkum. Síðustu 4 ár hefur hún keppt í Indy Car kappakstrinum og var valin nýliði ársins 2010. Sjálf segir hún þetta stórt skref í átt að ævilöngu markmiði. Hún kveðst ánægð með að fá tækifæri hjá jafn frábæru liði og Sauber.

Einungis ein önnur kona er ökumaður í formúlunni eins og er en Susie Wolff er þróunarökumaður hjá Williams-liðinu. Samtals hafa 2 konur tekið þátt í Formúlu 1 keppni. Það gerðist síðast í austurríska kappakstrinum árið 1976.