Háskólanemar yfirheyra frambjóðendur

Vaka, félag lýðræðissinnaðra stúdenta, stendur fyrir umræðum í Stúdentakjallara Háskóla Íslands í hádeginu í dag með fulltrúum þeirra stjórnmálaflokka sem bjóða fram til borgarstjórnarkosninga í vor.

 „Á kosningaárum höfum við haft það fyrir reglu að bjóða fulltrúum allra flokka til pallborðsumræðna,“ segir Stefán Óli Jónsson, liðsmaður í Vöku. 

Frambjóðendurnir sem sitja fyrir svörum verða þau Hildur Sverrisdóttir fyrir Sjálfstæðisflokkinn, Björk Vilhelmsdóttir fyrir Samfylkinguna, Sóley Tómasdóttir fyrir Vinstri Græna, S. Björn Blöndal fyrir Bjarta Framtíð, Óskar Bergsson fyrir Framsóknarflokkinn og Halldór Auðar Svansson fyrir Pírata. 



Fundarstjóri verður Eva Brá Önnudóttir, stjórnarmaður í LÍN og hefjast umræður klukkan tólf.