Framadýr og draumastörf

Framadagar AIESEC voru haldnir í Háskólanum í Reykjavík í dag og mættu fulltrúar frá 62 fyrirtækjum til að kynna sína starfsemi fyrir áhugasömum nemum. Framadagar eru árlegur viðburður sem nemendum allra háskóla á landinu gefst kostur á að sækja. Búist var við um 4000 gestum í dag og var mettþátttaka meðal fyrirtækja.

„Þetta eru alls kyns fyrirtæki. Við höfum reynt að hafa fjölbreytnina mikla þannig að það sé eitthvað fyrir alla, þetta er allt frá fjármálastofnunum yfir í tölvufyrirtæki og svo er EFTA hérna, þannig að það er ýmislegt í boði,“ segir Helga Beck, almannatengslafulltrúi Framadaga.

Svokölluð framadýr hafa vakið mikla athygli síðustu daga og þau má sjá í meðfylgjandi myndskeiði. „Þau hafa farið um bæinn til að kynna dagsetninguna okkar og að eitthvað væri í vændum. Þetta var dálítið leyndarmál en framadýrin eru eitt af því sem stendur upp úr hjá okkur,“ segir Helga.

Margir hafa fengið vinnu vegna Framadaga. „Okkur finnst vanta brú á milli nemenda og fyrirtækja og þetta er hinn fullkomni vettvangur fyrir fyrirtæki til að koma og kynna atvinnustarfsemi sína og ná beinni tengingu við nemendur,“ segir Arna Hrund Jónsdóttir, framkvæmdastjóri Framadaga. „Þau vita hverju þau eru að leita að og nemendur geta komið hingað og kynnt sig og vonandi fundið draumastarfið.“