Fáklædd stytta veldur fjaðrafoki

Stytta af manni á nærfötunum hefur valdið fjaðrafoki í kvennaskóla í Wellesley-háskólanum í Massachusetts. Meira en 300 stúdentar við skólann hafa skrifað undir áskorun um að fá styttuna sem ber nafnið „Sleepwalker“ eða „Svefngengillinn“ fjarlægða af skólalóðinni.

Segja nemendur við skólann að þar sem styttan sé mjög raunveruleg þá valdi hún ótta meðal nemenda, meðal annars við að verða fyrir kynferðislegri áreitni.

Samkvæmt Boston Globe var styttan sett upp á fjölförnum stað á skólalóðinni á mánudaginn sem partur af sýningu myndhöggvarans Tony Matelli við Davis safnið í skólanum. Forstöðumaður safnsins, Lisa Fischman, reyndi að verja styttuna og sagði hugmyndina um verk að flýja safnið vera mjög skemmtilega. Nemendur eru þó margir hverjir ósammála og vilja styttuna umsvifalaust burt af svæðinu.