Handleggsbraut greindarskertan mann með kúbeini fyrir að kyssa hönd stúlku

Davíð Örn Sigurðsson var í dag sakfelldur fyrir meiriháttar líkamsárás gagnvart tveimur mönnum með því að hafa handleggsbrotið þá báða með kúbeini. Þetta kemur fram í dómi Hæstaréttar sem birtur var í dag.

Aðdragandi líkamsárásarinnar var sá að annar maðurinn, sem er greindarskertur eftir slys, fór að húsi þar sem ung stúlka býr en í dóminum kemur fram að maðurinn hafi fellt hug til hennar. Mun maðurinn hafa kysst handarbak stúlkunnar og móðir hennar hafi orðið vitni að atvikinu. Stúlkunni líkaði ekki kossinn og því hafi hún talað við frænda sinn um að ræða við manninn og segja honum að henni hafi ekki líkað framkoman.

Móðir mannsins sagði fyrir dómi að frændi stúlkunnar hafi lokkað son sinn inn í bifreið til sín í stað þess að taka strætó. Annar vöðvastæltur maður hafi seinna sest inn í bifreiðina og sagt manninum að hann skuldaði frænda stúlkunnar 200 þúsund krónur fyrir að hafa kysst stúlkuna. Þeir hafi síðan afhent manninum miða með kennitölu og reikningsnúmeri og sagt honum að ef hann myndi ekki borga þá myndu þeir brjóta í honum öll bein og henda honum svo í gjótu.

Sparkaði upp hurðinni og barði með kúbeini

Maðurinn lýsti því svo fyrir dómi að hann hafi verið heima hjá sér ásamt félaga sínum þegar bankað hafi verið á útidyrahurðina. Íbúðin liggur að íbúð móður hans en hún hafði sagt honum að hafa strax samand við sig ef einhver myndi banka þar sem hún hafði séð kraftalegan mann leita að honum við íbúð hans fyrr um daginn.

Maðurinn sagði fyrir dómi að hann hafi farið til dyra og opnað en þegar hann hafi séð Davíð í dyrunum þá hafi hann lokað hurðinni aftur og farið inn í íbúðina. Sagði hann Davíð þá hafa sparkað upp hurðinni, komið inn og því næst gripið kúbein sem var í íbúðinni og barið félaga hans með því. Hann sagði félaga sinn hafa náð að flýja inn á baðherbergi þar sem Davíð hafi haldið áfram að berja hann með kúbeininu. Þegar Davíð hafi verið hættur að berja vin hans, hafi hann komið inn í stofu og barið sig með kúbeininu átta til tíu sinnum.   



Braut handlegg beggja

Samkvæmt læknisvottorði brotnaði framhandleggur mannins ásamt því að beinatilfærsla hafði orðið. Þá hafi olnbogi félaga hans verið brotinn og með liðhlaupi. Þurftu báðir mennirnir að sækja meðferð hjá bæklunarlækni. Í læknisvottorðinu kemur jafnframt fram að áverkar hafi verið alvarlegir og að höggin hafi verið þung og veitt með kúbeini og hafi því verið alvarleg.

Neitaði sök fyrir dómi

Davíð Örn neitaði sök fyrir dómi eftir að hafa játað brotin í skýrslutöku lögreglu. Ástæðuna sagði hann vera að hann hafi séð fyrir sér mjög langt gæsluvarðhald og því hafi hann ákveðið að segja já við öllu til að losna úr haldi. Þrátt fyrir að lýsingar hans þegar hann játaði hjá lögreglu hafi samrýmst vel lýsingum brotaþola sagðist hann bara hafa sagt það sem lögreglan hafi þegar sagt honum um málið.

15 mánaða fangelsi

Samkvæmt vottorði Sakaskrár ríkisins á Davíð talsverðan sakaferil að baki frá árinu 2003, meðal annars fjóra dóma fyrir ofbeldisbrot og höfðu þeir dómar ítrekunaráhrif við ákvörðun refsingar auk þess sem Davíð rauf skilorð með brotunum.

Davíð var í héraðsdómi dæmdur í 15 mánaða fangelsi og til að greiða mönnunum tveimur um það bil 600 þúsund krónur hvorum í miskabætur. Þá var hann auk þess dæmdur til greiðslu alls sakarkostnaðar. Hæstiréttur staðfesti í dag dóminn að öðru leyti en því að bætur til vinar annars mannsins renna til dánarbús hans þar sem hann er nú látinn.