Óléttar konur mega æfa og lyfta þungum lóðum

Jakobína Jónsdóttir gengur með sitt fyrsta barn og er komin 35 vikur á leið. Hún er vön því að æfa mjög mikið en lætur sér þessa dagana nægja klukkutíma æfingu, fimm sinnum í viku.

„Ef ég væri ekki að æfa myndi mér bara líða mjög illa held ég. Mér finnst rosalega gott að taka æfingu og svitna aðeins. Þannig líður mér betur, ég sef betur og  borða hollara, þetta tengist allt,“ segir Jakobína.

Eins og sjá má í meðfylgjandi myndskeiði þar sem Jakobína gerir ótrúlegustu æfingar, er hún augljóslega hreystin uppmáluð en hvað skyldi læknir segja? Er í lagi að æfa af krafti á meðgöngu?

„Já, við álítum að það sé í lagi, sérstaklega ef konur eru vanar því frá því áður en þær voru þungaðar,“ segir Hulda Hjartardóttir, aðstoðaryfirlæknir á fæðinga- og meðgöngudeild.

Hún segir í góðu lagi að lyfta þungum lóðum og segir konur helst þurfa að vara sig á íþróttum sem auki líkur á að þær detti eða reki sig harkalega í.

Margir telja hættulegt að óléttar konur lyfti þungu upp fyrir höfuðið en Hulda tekur ekki undir það. „Ég held að þetta sé bara ein af þessum flökkusögum . Ég þekki engin vísindaleg rök fyrir því að þetta megi ekki.“

Konur þurfa sjálfar að meta þol sitt en gæta þess að hvílast og borða og drekka vel. „Einhverjir hafa haft áhyggjur af því að ef konur æfi mjög lengi, lengur en 45 mínútur, þá geti orðið ofhitnun í líkamanum en ekkert bendir til þess,“ segir Hulda.

Konur í úthaldsíþróttum virðast eignast minni börn en aðrar en það þarf ekki að vera slæmt. „Sérstaklega þar sem börn hér á Íslandi eru með þeim stærstu og þyngstu í heiminum og það hefur frekar verið talið vandamál en  hitt.“

Ef konur telja sig þola hreyfingu segir Hulda hana góða. „Það er mælt með hálftíma þjálfun fimm til sjö sinnum í viku fyrir allar óléttar konur,“ segir hún og Jakobína tekur undir.

„Ef þið getið hreyft ykkur og ykkur líður vel er um að gera að hreyfa sig og reyna að borða hollan mat, manni líður miklu betur þannig,“ segir Jakobína að lokum.