Krabbameinstilfellum fjölgar um helming

Alþjóða heilbrigðisstofnunin sendi nýlega frá sér skýrslu þar sem fram kemur meðal annars að áætlað er að krabbameinssjúklingum í heiminum komi til með að fjölga um 70 % á næstu tuttugu árum.

Ef þessar niðurstöður eru heimfærðar upp á Ísland má áætla að um 50% aukning verði á krabbameinstilfellum hér á landi næstu tvo áratugina.

Einhvern hluta aukningarinnar má vissulega skrifa á sífellt lengri lífaldur fólks en ýmsilegt getum við þó gert sjálf. Laufey Tryggvadóttir, framkvæmdastjóri Krabbameinsskrár Íslands, segir mikilvægt að ráðast í fyrirbyggjandi aðgerðir sem lúta að lífsstíl fólks, þar vega þyngst hreyfingaleysi, reykingar og neysla á áfengi og sykri.

"Það er margsannað að hreyfing er til dæmis töframeðal gegn krabbameini," segir Laufey.

Forvarnir eru mikilvægar, en Jóhanna Eyrún Torfadóttir, doktor í lýðheilsufræðum segir afar mikilvægt að allir taki þátt.

"Við þurfum að passa hvað boðið er upp á fyrir börnin okkar í skólum. Auk þess þyrfa matvælaframleiðendur og verslunarmenn að bjóða hollari vörur á sama verði og óhollar," segir Jóhanna.

Umfjöllunina má sjá í heild sinni á meðfylgjandi myndskeiði.