Útfararþjónustan sýknuð af kröfu Kirkjugarða Reykjavíkur

Hæstiréttur sýknaði í dag Útfararþjónustuna ehf. af kröfu Kirkjugarða Reykjavíkur um að greiða gjald fyrir notkun á aðstöðu við útfarir. Staðfesti Hæstiréttur dóm Héraðsdóms Reykjavíkur frá því síðasta sumar.

Í dómnum segir að Kirkjugarðar Reykjavíkur hafi sent bréf til stjórnar Félags íslenskra útfararstjóra og tilkynnt að útfararþjónustum yrðu mánaðarlega sendar upplýsingar um allar athafnir hjá kirkjugörðunum svo þær gætu innheimt gjaldið hjá dánarbúi viðkomandi eða aðstandendum. Jafnframt yrði útfararþjónustum sendur reikningur í upphafi hvers mánaðar vegna athafna liðins mánaðar. Útfararþjónustan var krafin í samræmi við þetta en neitaði að greiða og endursendi reikninga. Í kjölfarið var málið höfðað.

Niðurstaða Hæstaréttar er sú að ef kostnaður hlýst af notkun á aðstöðu kirkjugarðanna falli hann á dánarbú viðkomandi eða þá aðstandendur sem að athöfn standa. Engin lagaheimild sé fyrir því að fella slíkan kostnað á útfararþjónustu.