Maður féll 15 metra í Kópavogi

Alvarlegt vinnuslys átti sér stað um hádegisbilið í dag við hús í Vallakór í Kópavogi. Maður sem var að störfum á palli á fjórðu hæð hússins féll þá niður og lenti á báðum fótunum.

Að sögn sjónarvotts var mjög hvasst í veðri og fallið um 15 metra hátt. Honum var komið á slysadeild Landspítalans og þótti ljóst að hann væri illa fótbrotinn.

Haft var samband við gjörgæsludeild Landspítalans við vinnslu fréttar en ekki gat fengist staðfest hvort maðurinn væri þar enn eða hvert ástand hans væri.