Viðurkenna ekki kjör nýs formanns

Ólafur Hrólfsson, sem titlar sig sem formann málfundafélagsins Óðins í yfirlýsingu til fréttastofu, neitar að viðurkenna kjör nýs formanns sem var kjörinn á fundi í gærkvöldi.

Ólafur segir Eirík Ingvarsson, sem hlaut kjör á fundinum, ekki vera löglega kjörinn og segir allar venjur og reglur Sjálfstæðisflokksins hafa verið þverbrotnar í kjörinu. Hið sama gildi um átta manna stjórn sem var kjörin til að starfa með Eiríki.

Óeining ríkir því um hver sé formaður félagsins og hverjir skipi stjórn þess.

„Skömmu áður en fundurinn átti að hefjast, kom í ljós að fráfarandi framkvæmdastjóri Sjálfstæðisflokksins og starfsmaður hans höfðu veitt viðtöku framboði frá hópi félagsmanna án þess að greina stjórn félagsins frá eða koma framboðstilkynningu til hennar,“ segir í yfirlýsingu sem lögmaður Ólafs sendi frá sér nú í morgun.

„Eru þessi vinnubrögð fráfarandi framkvæmdastjóra án fordæma í starfi Sjálfstæðisflokksins. Þau eru brot á öllum reglum og venjum sem í flokksstarfinu gilda. Er þetta einsdæmi í sögu flokksins og hafa engar skýringar verið veittar vegna þessa,“ segir þar að auki.

Vildi ekki tjá sig um hvers vegna fundinum var frestað

Fundurinn var boðaður klukkan 17.30 í gær, þann 6. febrúar, með viku fyrirvara. Fundarmönnum barst síðan klukkan 16.25 tölvupóstur þar sem eftirfarandi kom fram:

„Aðalfundi Málfundafélagsins Óðins sem vera átti í dag, fimmtudaginn 6. febrúar kl. 17.30 er frestað af óviðráðanlegum ástæðum um óákveðinn tíma.  Til nýs fundar verður boðað með auglýsingu.

Stjórnin“

Í samtali við fréttastofu neitaði Ólafur að tjá sig um hvers vegna fundinum hafi verið frestað. „Það er ekki fyrir alla að vita," segir Ólafur.

Hér má sjá yfirlýsingu Ólafs í heild sinni:

„Í samræmi við lög Óðins, málfundafélags í Verkalýðsráði Sjálfstæðisflokksins, auglýsti stjórn aðalfund félagsins með viku fyrirvara og skyldi halda fundinn í gær, 6. febrúar.

Frestur til að skila inn framboðum til stjórnar rann út án þess að framboð bærust stjórn félagsins.

Skömmu áður en fundurinn átti að hefjast, kom í ljós að fráfarandi framkvæmdastjóri Sjálfstæðisflokksins og starfsmaður hans höfðu veitt viðtöku framboði frá hópi félagsmanna án þess að greina stjórn félagsins frá eða koma framboðstilkynningu til hennar.

Eru þessi vinnubrögð fráfarandi framkvæmdastjóra án fordæma í starfi Sjálfstæðisflokksins. Þau eru brot á öllum reglum og venjum sem í flokksstarfinu gilda. Er þetta einsdæmi í sögu flokksins og hafa engar skýringar verið veittar vegna þessa.

Stóð stjórn Óðins þá frammi fyrir því annars vegar að lýsa framboðið sem þannig hafði borist stjórninni ólögmætt og halda fundinn eða fresta fundi hins vegar þannig að öllum sem áhuga hafa á að gegna trúnaðarstörfum gefist færi á að skila inn löglegu framboði.

Með sanngirnissjónarmið að leiðarljósi valdi stjórnin seinni kostinn og verður aðalfundur Óðins boðaður á ný á allra næstu dögum.

Stjórn Óðins bindur vonir við allir viðkomandi dragi lærdóm af mistökum framangreindra starfsmanna Sjálfstæðisflokksins svo að uppákoma á borð við þá sem varð í gær endurtaki sig ekki í flokksstarfinu.

Ólafur Hrólfsson, formaður stjórnar Óðins, málfundafélags."