Lögreglan hefur afskipti af berfættum skokkara

Lögreglan á höfuðborgarsvæðinu greindi frá því á Facebooksíðu sinni í gær að þeir hafi þurft að hafa afskipti af berfættum manni sem sást á hlaupum í miðborginni. Henni hafði borist tilkynning þess efnis að þarna væri maður á ferð sem greinilega var ekki alveg í lagi.

„Lögreglan fór þegar að svipast um eftir manninum og sá hann fljótlega á hlaupum skammt frá lögreglustöðinni við Hlemm. För hans var stöðvuð, en ekkert athugavert reyndist vera við manninn nema kannski það að hann var berfættur. Slíkt er í sjálfu sér ekki beinlínis lögreglumál og var skokkaranum, sem var allsgáður og sagðist stunda það að hlaupa berfættur, leyft að halda hlaupinu áfram. Auðvitað er þetta ekkert einsdæmi, og t.d veit sá sem þetta ritar að menn hlaupa berfættir heilt maraþon úti í heimi og þykir ekki tiltökumál. Að hlaupa berfættur í fljúgandi hálku um stræti og torg á Íslandi er hins vegar dálítið annað mál, eða svo myndu e.t.v. einhverjir halda,“ segir lögreglan.

„Þetta var ekki ég,“ segir Eyvindur Karlsson sem er eini þekkti skokkarinn sem hefur þann háttinn á að hlaupa berfættur. „Það eru greinilega fleiri farnir að hlaupa berfættir. En hef aldrei gerst svo brattur að hlaupa berfættur í sandinum og saltinu. Ég er á sandölum að vetrarlagi.“

Eyvindur segir ljóst að þarna sé gríðarlega harður nagli á ferð. „Þetta er einhver svakalegur. Ég á ekkert í þennan. Þetta er almennilegt.“ Eyvindur telur þetta vísbendingu um að það færist í aukana að menn hlaupi berfættir. Og tekur því ekki fjarri að rétt væri að stofna samtök berfættra skokkara. Hitt er svo annað mál að fólki bregður gjarnan í brún þegar slíkir hlauparar verða á vegi þeirra. „Skil ekki hvað viðkvæmni þetta er. Fólk hefur stoppað mig og spurt útí þetta. Eitt sinn var stoppað og spurt hvort það væri eitthvað að, hvort ég þyrfti aðstoð? Það er auðvitað ágætt í sjálfu sér að fólki standi ekki á sama. Dregur þá ályktun að einhver hafi tapað skónum sínum og sé í vandræðum. Náungakærleikur og hið besta mál.“

Innlegg by Lögreglan á höfuðborgarsvæðinu.