Fyrsti kjarasamningur ársins í Karphúsinu undirritaður

Blaðamannafélag Íslands hefur samið við Samtök atvinnulífsins um 2,8% launahækkun í kjarasamningi sem gildir út árið. Samningnum var vísað til ríkissáttasemjara fyrir skemmstu og var undirritaður í morgun.

Áður hafði verið samið við Fréttatímann, DV og Birting og voru samningar við þessa aðila í öllum aðalatriðum samhljóða þeim sem gerður var við SA.

„Samningurinn gildir frá 1. Janúar og innifelur 2,8% hækkun að lágmarki 8.000 krónur og hækkun á framlagi í starfsmenntastjóð,“ segir Hjálmar Jónsson, formaður Blaðamannafélags Íslands (BÍ) og bætir við: „Þetta er fyrsti kjarasamningurinn sem er gerður í Karphúsinu á árinu“

„Samninganefnd BÍ taldi að það væri skynsamlegt að gera þennan samning og undirbúa samning til lengri tíma frekar en að stefna þessu í deilur," bætir Hjálmar við.