„Treysti mér ekki til þess að sitja undir þeim ásökunum sem á mig voru bornar“

„Ég treysti mér ekki til þess að mæta á þennan fund því ég treysti mér ekki til þess að sitja undir þeim ásökunum sem á mig voru bornar.“ segir Nanna Atladóttir félagsráðgjafi sem stofnaði bloggsíðu í vikunni sem vakti mikla athygli og fékk meðal annars umfjöllun í fréttum Stöðvar 2. Starfsmannafundur var haldinn í Heilsugæslugæslunni Laugarási í hádeginu í gær vegna skrifa Nönnu sem kvartaði undan heilsugæslulækninum Pétri Skarphéðinssyni.

Nanna segir samstarfsfólk sitt hafa brugðist illa við skrifunum og hún hafi lítinn stuðning á vinnustaðnum. „Ég var borin þeim ásökunum að ég hafi niðurlægt konur með skrifum mínum og brotið trúnað. Báðar ásakanirnar eru rangar,“ segir félagsráðgjafinn.

Þrátt fyrir að hafa ekki mætt á fundinn var Nönnu samt sem áður tjáð hver niðurstaða fundarins hafi verið. „Konurnar á vinnustaðnum tjáðu sig um málið og engin sagðist hafa orðið fyrir neinum óþægindum vegna ummæla Péturs. Hann sagði svo sjálfur á fundinum að ef hann hafi móðgað einhverja konu, þá bæðist hann afsökunar,“ útskýrir hún.

Á bloggsíðunni kvartar Nanna undan heilsugæslulækninum á Laugarási, Pétri Skarphéðinssyni og segir meðal annars:

„Pétur kvartaði þá sáran yfir öllu sem væri orðið bannað, það mætti ekki lengur tala illa um guð hvað þá djöfulinn. Það setti hljóðan á kvenfólkið á kaffistofunni.  Engin hinna kvennanna tók undir athugasemdir mínar eða studdi málstað minn og satt best að segja átti ég ekki von á því.  Það er einfaldlega þannig að læknar eru  hér í guðatölu, orð þeirra eru heilagur sannleikur, hvorki meira né minna. Það vogar sér aldrei neinn að vera ósammála þeim, alla vega hef ég ekki ennþá hitt þá manneskju hér í sveitinni þessi átta ár sem ég hef starfað hér.“

Þrátt fyrir að hafa ekki treyst sér til þess að mæta á starfsmannafundinn ætlar hún að halda áfram að starfa á Laugarási. „Ég held áfram. Ég læt þetta ekki stoppa mig,“ segir Nanna ákveðin.

Starfsfólk í Heilsugæslunni neitar að tjá sig um málið.