"Höfum ekki efni á atvinnubótavinnu"

Eins og fram kom í kvöldfréttum Stöðvar 2 í gær hefur fyrirtækið Hagar sent formlega beiðni á atvinnuvega- og nýsköpunarráðuneytið að svokallaðir ofurtollar verði felldir niður við innflutning á nokkrum tegundum af ostum.

Samkvæmt upplýsingum frá ráðuneytinu var málið tekið fyrir á fundi þar fyrr í dag. Engin niðurstaða lá fyrir að honum loknum en nefndin mun funda aftur í næstu viku.

Beiðni af þessu tagi er þó ekki einsdæmi, Neytendasamtökin sendu álíka fyrirspurn á ráðuneytið árið 2011 en án árangurs.

„Þessi barátta heldur áfram þar til meira frelsi ríkir hér á landi með viðskipti á landbúnaðarvörum," segir Jóhannes Gunnarsson, formaður Neytendasamtakanna.

Tilgangur hinna títtnefndu ofurtolla er að vernda innlenda landbúnaðarframleiðslu. En þá má spyrja hvers vegna þeir eru lagðir á vörur á borð við frostpinna sem innihalda enga mjólk eða á paramessanost, sojamjólk og parmaskinku, því ekkert af því er framleitt hér á landi.

„Það er verið að gæta sérhagsmuna nokkurra einstaklinga á kostnað almennings. Svona mega stjórnmálamenn ekki hugsa," segir Jóhannes.

En geta innlend framleiðsla og innflutningur á erlendum landbúnaðarvörum ekki þrifist vel saman?

„Ég sé ekki fyrir mér að það muni halla á innlenda framleiðslu þó tollarnir verði aflagðir. En ef innlendir framleiðendur eru ekki samkeppnishæfir verða þeir að hagræða eða bara hætta framleiðslu. Við höfum ekki efni á að halda uppi atvinnubótavinnu," segir Jóhannes.

„Ef við viljum selja okkar góðu vörur á erlendum mörkuðum þurfum við að opna okkar markað fyrir erlendum vörum."