Rútuferð í Valhöll

„Þetta var hópur ungs fólks, á leið að kjósa ungan frambjóðanda,“ segir Andri Steinn Hilmarsson, frambjóðandi í prófkjöri Sjálfstæðisflokks í Kópavogi, um þá menntskælinga sem fengu rútuferð í Valhöll í gær.

Prófkjörið fer fram á morgun, en í gær voru nemendur við Menntaskólann í Kópavogi fluttir í tugatali til höfuðstöðva Sjálfstæðisflokksins til að skrá sig í flokkinn. Lá grunur á að þeir væru mættir til stuðnings Andra Steins, sem er fæddur 1993 og því yngsti frambjóðandinn í prófkjörinu.

„Já, þetta var á mínum vegum,“ segir Andri Steinn. „Þetta var fólk sem ætlaði að skrá sig á laugardaginn en var búið að gefa það út að það kæmist ekki.“

Andri Steinn, sem býður sig fram í 4.-5. sæti, segist hafa útvegað rútuna þegar hann áttaði sig á því hversu marga stuðningsmenn hann ætti í skólanum sem ættu erfitt með að koma sér í Valhöll. Nemendurnir voru sóttir í hádeginu svo enginn missti úr tíma og sá frambjóðandinn meira að segja fyrir veitingum.

„Já, ég var með gosdrykki á leiðinni og svo voru pítsur fyrir þá allra svengstu,“ segir Andri Steinn, sem telur að í kringum fimmtíu manns hafi þegið skutlið á kjörskrá.