Fundu loðnu undan Skeiðarársandi

Nokkur íslensk skip eru farin til loðnuleitar að nýju eftir að fréttir bárust af því að vart hefði orðið við loðnu á veiðislóð undan Suð-Austurlandi og eins í mynni Eyjafjarðar. Þetta kemur fram á vefsíðu HB Granda en skipið Lundey NS er nú við loðnuleit í Eyjafirði.

Báturinn Faxi RE hafði fengið um 100 tonn af loðnu í tveimur köstum í dag en báturinn var að veiðum undan Skeiðarársandi. 

Tvö norsk skip voru við loðnuleit í Eyjafirðinum í gær en stór floti norskra skipa hefur leitað að loðnu út af Austfjörðum án árangurs en vika er þar til að heimild þeirra til loðnuveiða á Íslandsmiðum rennur út.