Kvenlægur kraftur í Þríleik Íslenska dansflokksins

Sýnd verða þrjú ólík verk með Norrænu þema. Athygli vekur að öll verkin eru samin af konum sem ku, samkvæmt aðstandendum, vera allt of sjaldgæf sjón innan veggja leikhússins. 

Verkin þrjú sem sýnd verða eru:

Tilbrigði eftir Bryndísi Höllu Gylfadóttur, F A R A N G U R, nýtt íslenskt dansverk eftir Grímuverðlaunahafann Valgerði Rúnarsdóttur og Berserkir eftir danska danshöfundinn Lene Boel, sem er magnþrungin blanda break, nútímadans og ballett með akróbatísku tvisti.

Þegar fréttastofa leit við á æfingu í dag hittum við fyrir höfunda tveggja síðarnefndu verkanna ásamt tveimur dönsurum úr sitthvoru verkinu.

Í verki Lene Boel fæst hún við goðafræðina. Hún hefur starfað víða um heim en þetta er í fyrsta skipti sem hún setur upp verk hér á landi. Lene er talsvert þekkt í heimalandi sínu fyrir sérstæðar samsetningar og notkun á dansstílum.

Það sem tengir verkin, auk þess Norræna er það að höfundar þeirra eru konur og verkin því það sem kalla mætti kvenlæga speglun á fortíð og nútímasamfélag.

Verkin þrjú eru afar ólík innbirðis svo allir ættu því að fá eitthvað fyrir sinn snúð.

Í meðfylgjandi myndskeiði má sjá dansarana á æfingu í dag auk viðtala við höfundana tvo.