Telur umræðuna ekki vera á Villigötum

Júlíus Rafnsson, framkvæmdastjóri dvalarheimilisins Áss í Hveragerði sagði í kvöldfréttum Stöðvar tvö í gær að umræðan um að gamalt fólk sé fjötrað á dvalarheimilum sé á villigötum. Sagði Júlíus að í gæðavísum Landlæknisembættisins flokkist hliðargrindur á rúmum sem fjötrar og því sé orðið rangnefni í þeirri umræðu sem verið hefur.

Dr.Ingibjörg Hjaltadóttir, sérfræðingur í öldrunarhjúkrun segir það ekki rétt að rúmgrindur séu inní útreikningum gæðavísa Landlæknis.

„Ég held að það sé misskilningur hjá Júlíusi að rúmgrindur séu inní útreikningum gæðaviðmiða. Til þess að þessi gæðavísir telji þá þarf íbúi að vera með líkamsfjötra, bundinn á höndum og fótum í rúmi eða bundinn í stól. Þetta þarf að vera gert á hverjum einasta degi til að viðkomandi teljist fjötraður samvkæmt gæðavísinum. Ef það er ekki gert þá kemur það ekki fram í talningu,“ segir Ingibjörg. Hún telur umræðuna um fjötra ekki vera á villigötum.

„Ég veit ekki hvaða umræðu Júlíus er að tala um. Umræðan sem ég hef tekið eftir í fjölmiðlum hefur verið sú að notkun fjötra sé ekki góð. Ég held það séu allir sammála um það að eigi ekki að fjötra fólk nema í ítrustu neyð,“ segir Ingibjörg og bætir við að góður árangur hafi náðst hér á landi í að minnka notkun fjötra.

„Undanfarin þrjú til fjögur ár hefur notkun fjötra á hjúkrunaheimilum hér á landi minnkað marktækt. Árið 2009 voru 9,6 prósent íbúa með fjötra daglega en árið 2012 var talan komin niður í 6,7 prósent. Það er að mínu mati glæsilegur árangur. Almennt er talið æskilegt að vera fyrir neðan 12 prósent og við erum því langt fyrir neðan viðmiðunarmörk í þessum málum,“ segir Ingibjörg Hjaltadóttir.