Nadal missti sig og Sharapova úr leik

Rafael Nadal vann sigur á Kei Nishikori í spennuþrungnum þriggja setta leik á Opna ástralska meistaramótinu í morgun. Maria Sharapova er hins vegar á heimleið.

Nadal missti stjórn á skapi sínu í leiknum í nótt eftir að hafa verið áminntur fyrir að tefja leik. Spánverjinn er þekktur fyrir að gefa sér tíma í uppgjafir sínar. Grískur dómari leiksins ákvað að taka á málinu þegar staðan var 4-4 og 40-40 í þriðja setti. Nadal trylltist og grýtti tennisbolta af því tilefni.

Nishikori nýtti sér uppnám Nadal, vann næstu tvö stig, og náði forystu í settinu. Spánverjinn sneri hins vegar við blaðinu í settinu og tryggði sér sæti í átta liða úrslitunum með 7-6, 7-5 og 7-6 sigri.

Nadal sagðist í viðtali eftir leikinn vera ósáttur við dómarann. Vissulega gæti hann refsað honum fyrir leiktöf en það væri ekki í þágu leiksins eða áhorfenda. Hann myndi þó passa sig í framtíðinni.

Maria Sharapova beið lægri hlut gegn Dominiku Cibulkovu frá Slóvakíu í þremur settum, 3-6, 6-4 og 6-1. Sharapova, sem vann sigur á mótinu árið 2008, sagðist í leikslok að hún ætti nokkuð í land með að ná fyrri styrk eftir axlarmeiðsli síðasta árs.

Þá var Roger Federer að tryggja sér sæti í átta liða úrslitum eftir öruggan sigur á Frakkanum Jo-Wilfried Tsonga 6-3, 7-5 og 6-4.

Opna ástralska mótið er í beinni útsendingu á Eurosport í Fjölvarpi Stöðvar 2.