Segir meirihlutann reyna að þagga niður óþægileg mál

Sóley Tómasdóttir, borgarfulltrúi Vinstri grænna, hefur beðið í marga mánuði eftir að fá svör meirihlutans í borgarstjórn við fyrirspurn um viðbrögð við vangoldnum skuldum vegna skólamáltíða. Hún sakar meirihlutann um að þagga málið niður.

Fram kom síðasta haust að börnum væri vikið úr leikskólum og frístundaheimilum vegna vangoldinna gjalda. Þá lagði Sóley til að innheimtureglur yrðu þannig að börnin fengju áfram þjónustuna. Slíkt gildir um skólamáltíðir, engum börnum er vísað frá. Sóley vill sjá hið sama gilda fyrir leikskóla og frístundaheimili. 

Meirihlutinn hefur sagt að ekki sé hægt að breyta reglunum. Að jafnt gildi fyrir alla borgarbúa, þeir sem fái þjónustu og borgi ekki fyrir hana hætti að fá þjónustu.

„Meirihlutinn hefur notað þessi rök gegn því að breyta innheimtureglum en virðir síðan ekki eigin reglur þegar það kemur að skólamáltíðum. Því ég veit að engum börnum er synjað um mat. Sem er gott en þarna er mikið misræmi í þeirra eigin málflutningi. Þannig að mér er ekki svarað því upplýsingarnar koma sér illa fyrir þau,“ segir Sóley.

Vegna þessarar biðar hefur Sóley óskað eftir minnisblaði frá skrifstofustjóra borgarstjórnar um málsmeðferð og hvað almennt teljist eðlilegt að upplýsingaöflun kjörinna fulltrúa taki langan tíma. „Ítrekaður dráttur á svörum við fyrirspurnum minnihlutans vekur spurningar um rétt kjörinna fulltrúa til upplýsinga og stöðu meirihluta til að þagga niður óþægileg mál með þessum hætti.“