Misþyrmdi samfanga

Baldur Kolbeinsson, fangi á Litla-Hrauni, sem ákærður hefur verið fyrir árás á samfanga sinn er gefið að sök að hafa meðal annars safnað töluverðu magni af mannasaur í poka og troðið saurnum upp í munn annars fanga.

Árásin náðist á myndband og samkvæmt heimildum fréttastofu hafa sjónarvottar séð fáar hliðstæður aðferðanna sem Baldur beitti við að skaða og niðurlægja fórnarlamb sitt.

Hann sló manninn auk þess ítrekað í höfuð og líkama.

Sá sem fyrir árásinni varð situr inni fyrir kynferðisbrot gegn barni en hann hefur nú verið fluttur í annað fangelsi.

Þetta er í annað sinn sem Baldur er ákærður fyrir líkamsárás á Litla-Hrauni en hann fékk 10 mánaða dóm fyrir að ráðast á þrjá fangaverði í lok september á síðasta ári ásamt Matthíasi Mána Erlingssyni. Þá er hann einnig grunaður um að hafa ráðist á Matthías Mána, ásamt öðrum manni, og barið hann með stórum hengilás.

Páll Winkel, fangelsismálastjóri, gat ekki tjáð sig um málið að svo stöddu. Hann sagði þó að fangelsisyfirvöld reyndu hvað þau gætu til að koma í veg fyrir ofbeldi innan fangelsisins en því miður væri það ekki alltaf hægt