Formaður VG telur umhverfisráðherra ætla á svig við rammaáætlun

Formaður Vinstri grænna segir brýnar spurningar vakna eftir að umhverfisráðherra gaf rými fyrir nýjan virkjanakost með breytingum á mörkum friðlands Þjórsárvera. Náttúruverndarmál verði fyrirferðarmikil á vorþingi eftir að ráðherra ákvað að afturkalla ný náttúruverndarlög.

Alþingi kemur saman í dag að loknu jóleyfi og klukkan tvö fer fram sérstök umræða um stöðu verndarflokks rammaáætlunar um virkjanakosti að beiðni Katrínar Jakobsdóttur formanns Vinstri grænna.

„Það eru auðvitað mjög margar brýnar spurningar sem hafa vaknað eftir að umhverfisráðherra kynnti þau áform sín að breyta mörkum friðlands Þjórsárvera og gefa þannig rými fyrir nýjan virkjanakost. Það er mikilvægt að hann skýri tilurð þessarar tillögu, sem er breytt frá því sem Umhverfisstofnun lagði til við undirbúning friðlýsingar svæðisins,“ segir Katrín

Þá sé líka mikilvægt að ráðherra skýri hvernig hann hyggist almennt fara með þá virkjanakosti sem settir voru í verndarflokk í gildandi rammáætlun.

„Því lögum samkvæmt á að friðlýsa þau svæði. Það er auðvitað mikilvægt að við áttum okkur á því hvort ráðherrann telji að þessir kostir séu áfram undir í einhverri umræðu. Að það sé til umræðu að  breyta þessari flokkun eitthvað í kjölfar þess sem gerst hefur á síðustu dögum,“ segir Katrín.

Það liggi fyrir að með byggingu Norðlingaölduveitu yrði farið á svig við gildandi rammaáætlun. Það hafi komið fram að hálfu fræðimanna og fagmanna sem unnu að undirbúningi gildandi rammaáætlunar. Verkefnisstjórn hafi lagt til að Norðlingaölduveita yrði í verndarflokki. Það sé rangt að hugmyndir um þennan nýja virkjanakost stangist ekki á við gildandi rammaáætlun.

„Það stangast á við mat þessara fagmanna sem unnu þessa áætlun. Og ráðherra hefur nú sagst ætla að fylgja því sem fagmenn segja í þessu máli,“ áréttar Katrín.

Rammaáætlun og náttúruverndarmál reyndust síðustu ríkisstjórn erfið vegna andstöðu núverandi stjórnarflokka. Katrín segir þetta hápólitísk mál og þegar umhverfisráðherra hafi boðað að náttúruverndarlög sem taka áttu gildi í vor verði afturkölluð, hljóti að þurfa að ræða þau mál ítarlega.

„Umsagnaraðilar lýsa miklum áhyggjum af því að það eigi í raun og veru að fara að hverfa aftur í lagaumhverfi  náttúruverndar frá árinu 1999 á þeim tíma sem viðhorf manna hafa breyst  og það hefur orðið breyting á þróun umhverfisréttar. Þannig að ég held að þetta verði auðvitað stórt mál á vorþinginu sem og auðvitað  meðhöndlun rammaáætlunar,“ segir Katrín Jakobsdóttir.

Umræður um málið hefjast á Alþingi klukkan 14:00.