Umhverfisráðherra sakaður um að vilja virkja á verndarsvæði

Umhverfisráðherra vill endurskoða verndunarsvæði við Þjórsárver, sem gæti leitt til þess að virkjað verði með Norðlingaölduveitu, sem ekki væri kostur ef friðað væri samkvæmt gildandi rammaáætlun.

Stjórnarandstaðan sakar umhverfisráðherra um að ætla að koma virkjunum inn á svæði sem nú er í verndarflokki samkvæmt rammaáætlun. En ráðherra segir að hægt sé að endurmeta virkjunarkosti hafi þeir ekki nú þegar verið friðlýstir.

Náttúruverndar- og virkjanamál voru síðustu ríkisstjórn ákaflega erfið og það er augljóst á upphafi vorþings að þau mál verða áfram umdeild.

Stjórnarminnihlutinn sakar stjórnarminnihlutann um að seilast inn á verndarsvæði í virkjanamálum.

Átökin snúast um hvar á að virkja í framtíðinni og hvar ekki og hvaða svæði beri að vernda til frambúðar fyrir virkjunum. Í dag spurðu Katrín Jakobsdóttir formaður Vinstri grænna og Róbert Marshall þingflokksformaður Bjartrar framtíðar umhverfisráðherra út í fyrhugaðar breytingar hans á stærð friðlandsins við Þjórsárver en stjórnarandstaðan sakar stjórnarmeirihlutann um að reyna þannig að smokra Norðlingaölduveitu út úr verndarflokki í vikjanakost.

Katrín segir óvissu hafa ríkt um svæðið frá því umhverfisráðherra frestaði friðlýsingu svæðisins í fyrra og í framhaldinu gert tillögu að breyttum mörkum friðlandsins.

„Sú nýja tillaga að breyttum mörkum friðlandsins virðist stafa af því að Landsvirkjun hafi haldið fund með fulltrúum umhverfisráðuneytis og kynnt þar hugmynd að nýjum virkjanakosti sem hægt væri að ráðast í með þessum breyttu mörkum.Sá virkjanakostur hefur hins vegar í för með sér mikil umhverfisáhrif á svæðinu í kring, ekki síst á fossana þrjá Dynk, Gljúfurleitafoss og Kjálkaversfoss,“ segir formaður Vinstri grænna.

Fagfólk telji ekki hægt að skilja það svæði frá Þjórsárverum.

„Það eru mikil vonbrigði þegar hæstvirtur umhverfisráðherra, sem reyndar er bara umhverfisráðherra í hlutastarfi, nálgast þessa þrjá málaflokka (nýtingu, vernd og friðun) eins og götulistamaður með þrjú glös og lætur almenning og okkur þingmenn giska á hvað hann eigi við með málflutningi sínum og undir hvaða glasi peningurinn sé,“ sagði Róbert Marshall.

Ráðherra sagði lagalega óvissu ríkja um svæðið.

„Stutta svarið við fyrirspurn háttvirts þingmanns, Katrínar Jakobsdóttur, hvort hér sé tillaga Landsvirkjunar á ferðinni, þá er svarið nei,“ sagði Sigurður Ingi Jóhannsson umhverfisráðherra. Lagalega óvissu ríkti hins vegar um svæðið.

„Jafnframt er í þessu samhengi mikilvægt að minna á það ákvæði í nýsamþykktum  lögum hér í þinginu í tíð fráfarandi ríkisstjórnar, að hægt sé að senda orkukosti sem komnir eru í verndarflokk en ekki búið að friðlýsa í endurmat til verkefnisstjórnar rammaáætlunar,  þar sem nýjar útfærslur geta komið til skoðunar,“ sagði Sigurður Ingi á Alþingi í dag.