Verið að eyða peningum sem ekki eru til

Bæjarstjórinn í Kópavogi segir greinilegt að minnihlutinn sé byrjaður í kosningabaráttu fyrir sveitastjórnarkosningarnar í vor. Tillaga sem samþykkt var á bæjarstjórnarfundi í gærkvöld sé ekkert annað en kosningavíxill. Sjálfstæðismaðurinn, Gunnar Birgisson, segist áfram styðja meirihlutann þrátt fyrir að hafa greitt atkvæði með tillögu minnihlutans.

Tillaga minnihlutans á bæjarstjórnafundi í gærkvöld var svohljóðandi:

„Vegna neyðarástands á húsnæðismarkaði samþykkir bæjarstjórn að kaupa núþegar 30-40 íbúðir víðsvegar í bænum til að mæta vanda þeirra sem þurfa á félagslegum úrræðum að halda í húsnæðismálum. Jafnframt samþykkir bæjarstjórn að hefja núþegar undirbúning að byggingu tveggja fjölbýlishúsa með leiguíbúðum. Gert er ráð fyrir aðþær verði tilbúnar áárinu 2015.“

Bæjarstjórinn í Kópavogi, Ármann Kr. Ólafsson, gagnrýnir minnihlutann helst fyrir tvennt, í fyrsta lagi fyrir að vilja ekki fresta afgreiðslu tillögunnar og í öðru lagi fyrir að gera ekki grein fyrir því hvernig eigi að fjármagna framkvæmdirnar sem gróflega reiknað kosti um þrjá milljarða.

„Þarna er um að ræða nærri tvöföldun á því fé sem við höfum til framkvæmda á hverju ári. Þarna er alveg klárt að verið er að eyða peningum sem ekki eru til,“ segir Ármann.

Ármann segir að undanfarna mánuði hafi þverpólitísk nefnd verið að störfum til að leysa húsnæðisvanda Kópavogsbæjar. Sú vinna sé nú að engu gerð. Tímasetninguna segir Ármann að rekja megi til þess að kosningar séu á næsta leyti.

„Þetta er bara kosningavíxill.“

Gunnar Birgisson, segir ástæðuna fyrir því að hann greiddi atkvæði með tillögunni einfalda.

„Það er neyðarástand í þessum málum í Kópavogi, okkar minnstu bræður og systur eru í vandamálum með húsnæði eru sum hver á vergangi. Þannig að eðlilega studdi ég þessa tillögu. Það þýðir ekki endalaust að setja málin í nefndir og drepa málin þar með á dreif,“ segir Gunnar.

Vissirðu að þessi tillaga yrði lögð fram í gær?

„Nei, ég vissi ekki af því.“

Vangaveltur um hvort meirihlutinn í Kópavogi sé starfhæfur eftir atburði gærkvöldins hafa verið háværar í allan dag. Sjálfur segist Gunnar ekki hafa áhyggjur af því, hann muni áfram styðja meirihlutann.

„En ef að það kemur að svona málum þar sem er neyðarástand og fólk áttar sig ekki á því, stingur frekar hausnum í sandinn, þá verður að koma eitthvað til að vekja upp fólk og til að fá eitthvað í gang til að leysa málin,“ segir Gunnar.