Upplifa stjórnleysi í stjúpfjölskyldum

Í nýrri könnun um stjúpfjölskyldur kemur meðal annars fram að stjúpforeldrum og foreldrum finnst flóknara að vera í stjúpfjölskyldum en þeir áttu von á og eru óvissir um hlutverk sitt.

Valgerður Halldórsdóttir, félagsráðgjafi og formaður Félags stjúpfjölskyldna, gerði könnunina og mun kynna niðurstöður hennar á málþingi um margbreytileika fjölskyldugerða á morgun.

„Þessi rannsókn hefur sínar takmarkanir en gefur vísbendingar um stöðuna og ástæðu til að kanna málin nánar,“ segir Valgerður. „Það vantar ef til vill samanburð við aðrar fjölskyldugerðir en það er augljóst að margir stjúpforeldrar eru óvissir um stöðu sína í fjölskyldunni, hvar og hvort þeir megi setja mörk og efast jafnvel um hvort tilfinningar þeirra eigi rétt á sér.“

Valgerður bendir á að fyrr á tímum var hlutverk stjúpforeldris mun skýrara. Yfirleitt var það staðgengill foreldris sem var annaðhvort látið eða fjarverandi. Í dag eru aftur á móti yfirleitt fyrrverandi makar á hliðarlínunni og þátttakendur í lífi barna sinna.

„Það kom til dæmis í ljós að um 25 prósent svarenda eru mjög sammála eða sammála því að foreldri eigi ekki að borga meðlag með barni sem býr bæði með foreldri og stjúpforeldri. Umræðuna um fjárhagslegan stuðning í stjúpfjölskyldum þarf að kanna nánar.“

Valgerður segir niðurstöður könnunarinnar staðfesta margt sem hún hefur séð og heyrt í starfi sínu í fjölskylduráðgjöf við stjúpfjölskyldur.

„Það er ánægjuefni að finna áhuga þeirra sem standa að málþinginu. Fram til þessa hefur ákveðin stjúpblinda einkennt samfélagið þar sem stjúptengsl hafa nánast verið ósýnileg í opinberri stefnumótun, gögnum, umræðum, rannsóknum sem og markaðssetningu vöru og þjónustu. Það er kannski ekki skrýtið að stjúpforeldrar séu óöryggir í hlutverki sínu.“