Nóg að gera hjá slökkviliði

Slökkviliðið á höfuðborgarsvæðinu hafði í nógu að snúast í kvöld. Allt tiltækt slökkvilið var sent í Smiðshöfða í Reykjavík rétt eftir klukkan 22 vegna tilkynningar um eld á gólfi trésmíðaverkstæðis.

Um lítilsháttar eld að ræða en tilkynningin barst slökkviliðinu frá vaktmanni Securitas. Ekki fengust upplýsingar um skemmdir og eldsupptök eru ókunn.

Skömmu síðar var tilkynnt um eld í grillvagni við Skemmuveg í Kópavogi. Um töluverðan eld var að ræða og sprakk gaskútur í vagninum. Aldrei var þó hætta á útbreiðslu eldsins að sögn slökkviliðs. Eldsupptök eru ókunn og vagninn er ónýtur.