Kærkomin viðbót fyrir lesblinda

Litaðar tússtöflur eru nýjung sem gagnast lesblindum og auðvelda þeim lestur. Formaður Félags lesblindra segir töflurnar kærkomna viðbót við litaglærur og lituð blöð sem hafa reynst lesblindum vel í lestri og skólastarfi.

Litaður grunnur skapar hagstæðari skerpuskil á milli bakgrunns og texta en hvítur gunnur og auðveldar lesblindum lestur. Nýlega hóf fyrirtækið PROARC framleiðslu á lituðum tússtöflum sem gegna sama hlutverki og litaglærur og lituð blöð. Hefðbundnar hvítar tússtöflur eru fremur skítsælar og voru lituðu töflurnar upphaflega hugsaðar sem snyrtilegri valkostur. Fljótlega kom í ljós að þær gætu jafnframt gagnast lesblindum og hentað í hvers kyns skólastarf.

Snævar Ívarsson, framkvæmdastjóri Félags lesblindra á Íslandi, fagnar viðbótinni. „Það er vel þekkt að litaglærur og lituð blöð gagnast lesblindum. Mér finnst þetta kærkomin viðbót.“

Bækur eru í flestum tilfellum prentaðar á hvítan pappír og hefur mörgum lesblindum reynst erfitt að lesa svart letur af hvítu blaði. „Sé lögð litaglæra yfir mýkist skerpan og lesblindum gengur betur að lesa. Að sama skapi hafa margir skólar tekið upp á því að bjóða lesblindum að fá verkefni og próf á lituð blöð. Litaðar tússtöflur virka svipað,“ útskýrir Snævar.

Oftast eru ljósgulir og ljósbláir litatónar notaðir en það er þó að sögn Snævars einstaklingsbundið hvað hverjum þykir best. „Ég hef vanið mig á gula litinn en sumum finnst líka gott að skipta á milli lita.“

Snævar er með gula tússtöflu á skrifstofu Félags lesblindra á Íslandi. „Við notum hana á fundum og til að skrifa minnisatriði og setja upp markmið. Hér ríkir mikil ánægja með töfluna og ég sem lesblindur finn mun. Ég gat valið nákvæmlega þann lit sem ég vildi og fékk töfluna merkta félaginu.“

Snævar myndi vilja sjá litaðar tússtöflur í skólastofum. „Töflurnar vinna með lesblindum. Þær vinna hins vegar ekki gegn öðrum nemendum. Ég tek stundum dæmi af því að lyftur eru settar í hús svo fólk í hjólastólum komist á milli hæða. Þær nýtast hins vegar mörgum ófötluðum líka.“

Hægt er að fá töflurnar línustrikaðar og með ýmiss konar bakgrunni eftir því hvaða tilgangi þær eiga að þjóna. Til dæmis með skýjum – með vísun í máltækið skrifað í skýin. Um er að ræða íslenska framleiðslu. Nánar á proarc.is.