Kennarar dæmi ekki siðferði

„Ég lít svo á að hlutverk okkar í skólanum sé að styðja við bakið á þeim sem vilja læra en ekki að segja hvort þeir séu merkilegir pappírar,“ segir Atli Harðarson, skólameistari Fjölbrautaskólans á Akranesi.

Mennta- og menningarmálaráðuneytið hefur kynnt hugmyndir um að nemendur sem ljúka framhaldsskólaprófi fái sérstakar umsagnir um sig frá viðkomandi skóla. Þessu hefur Atli mótmælt en í bréfi sem ráðuneytið sendi honum er vísað í aðalnámskrá þar sem segir að framhaldsskólaprófi ljúki með útgáfu prófskírteinis með umsögn um almenna þekkingu, leikni og hæfni nemandans auk einkunna hans.

Atli segir í bréfi til ráðuneytisins að hefðbundið skírteini innihaldi lítið annað en einkunnir sem nemandi hafi fengið í einstökum áföngum eða námsgreinum. Þetta séu ekki miklar upplýsingar en þær geti verið þokkalega traustar og sanngirni gagnvart nemenda sé tryggð.

„Það er vandséð hvernig skóli getur komið sér upp traustum gögnum um sjálfsmynd og sjálfsþekkingu, almenna hæfni, hugsunarhátt og viðhorf eða siðferðilega mannkosti nemenda,“ segir Atli.

Meðan ekki sé fundin leið til að skrá og varðveita áreiðanleg gögn um þessi efni segir Atli nær fráleitt að þau séu sett á prófskírteini.

Atli telur að það sé siðferðilega hæpið að stofnanir ríkisins felli dóma um þankagang, sjálfsþekkingu, sjálfsmynd og siðferði fólks. Ríkisstarfsmenn sem fullyrða af og á um hverjir bera virðingu fyrir réttum gildum og geti verið ábyrgir borgarar setji sig á ansi háan hest.

Tillögur menntamálaráðuneytis að umsögnum um framhaldsskólanema

 Hann/hún getur tjáð hugsanir sínar í rökréttu samhengi.

Hann/hún getur tjáð sig á einfaldan hátt á erlendum tungumálum. 

Hann/hún getur átt jákvæð og uppbyggilega samskipti og samstarf við annað fólk.

Hann/hún er verklega sjálfbjarga í daglegu lífi. 

Hann/hún hefur skýra sjálfsmynd. 

Hann/hún tekur afstöðu til eigin velferðar, líkamlegrar og andlegrar. 

Gerir sér grein fyrir hvernig hann/hún getur nýtt sér sínar sterku hliðar á skapandi hátt. 

Hann/hún ber virðingu fyrir lífsgildum, mannréttindum og jafnrétti.

Hann/hún getur verið virkur og ábyrgur borgari í lýðræðislegu nær- og fjærsamfélagi

Gagnrýni svarað í dag

Sigríður Hallgrímsdóttir, aðstoðarmaður Illuga Gunnarssonar, mennta- og menningarmálaráðherra, segir ráðuneytið munu svara gagnrýni á fyrrgreindar umsagnir um framhaldsskólanemendur í dag.