Nafn látinnar dóttur enn í skráningarkerfi Fjölnis

Móðir stúlku sem lést úr krabbameini árið 2007 rakst á nafn hennar í flettilista þegar hún skráði aðra dóttur sína á íþróttanámskeið hjá Ungmennafélaginu Fjölni í gær.

Móðirin, Gréta Ingþórsdóttir, hefur látið sig málefni krabbameinssjúkra barna varða en hún er framkvæmdastjóri SKB - Styrktarfélags krabbameinssjúkra barna. Hún segir þetta vera spark í magann og treystir sér ekki í viðtal.

Gréta gaf Vísi hins vegar leyfi til að segja söguna. Hún segir að ef félagið er með tengingu við þjóðskrá sem setji inn ný börn eigi um leið að taka út látin börn.

„Það hlýtur að vera hægt að forrita þessi fínu kerfi betur,“ segir Gréta á Facebook-síðu sinni en skrifstofa Fjölnis var lokuð þegar hún reyndi að hafa samband.

„Þó að ég hugsi alltaf til hennar með elsku og hlýju þá er svona uppákoma líka áminning um að því miður er ekki hægt að skrá hana á nein námskeið eða eitt né neitt.“

Í athugasemdakerfinu tjá nokkrir sig sem hafa svipaða sögu að segja. Fá þeir til dæmis enn póst frá fjölmörgum fyrirtækjum stílaðan á látna fjölskyldumeðlimi, boð um að koma í læknisskoðanir og fleira.

Verður kannað strax

Skrifstofa Fjölnis er lokuð í dag en félagið notar skráningar- og greiðslukerfið Nóra. Það er fyrirtækið Greiðslumiðlun sem sér um kerfið.

„Þetta kemur mér eiginlega í opna skjöldu,“ segir Guðmundur Árnason, verkefnastjóri hjá Greiðslumiðlun. „Ég hélt að þetta gæti ekki gerst.“

Guðmundur segist muna eftir einu sambærilegu atviki en í því tilfelli var stuttur tími liðinn frá andláti og þjóðskrá ekki uppfærð daglega eins og í dag.

„Þetta er auðvitað óskaplega óþægilegt. Það verður bara að kanna þetta strax. Ég er nú fyrrverandi stjórnarmaður í Fjölni og þetta snertir mig.“