Næstbesti lýsir yfir vantrausti á bæjarstjórann

Oddviti Samfylkingarinnar segir bæjarstjórann í Kópavogi hafa sýnt af sér dómgreindarleysi með því að tala niður fjárhag bæjarins vegna tillögu minnihlutans í húsnæðismálum. Þá lýsir oddviti Næstbesta flokksins yfir vantrausti á bæjarstjórann.

Ármann Kr. Ólafsson oddviti Sjálfstæðismanna í Kópavogi og bæjarstjóri hefur fullyrt að tillaga minnihlutans í bæjarstjórn með stuðningi Gunnars Birgissonar bæjarfulltrúa Sjálfstæðisflokksins, kosti bæinn um þrjá milljarða króna. Hann kallaði eftir lánshæfismati fyrir bæinn hjá Reitun sem breytti horfum bæjarins í neikæðar vegna þessa.

Í tilkynningu frá Guðríði Arnardóttur, oddvita Samfylkingarinnar í bænum, segir að með þessu hafi dómgreindarskortur bæjarstjóra náði nýjum hæðum. Það hljóti að vera einsdæmi að bæjarstjóri standi á torgum úti og tali niður fjárhag bæjarins, sem engin ástæða sé til.  Bæjarstjórinn vinni beinlínis gegn hag bæjarins og keyrir sjálfur niður lánhæfismatið.

Hjálmar Hjálmarsson oddviti Næstbesta flokksins tekur í svipaðan streng. Tillaga minnihlutans stefni fjárhag bæjarins ekki í voða.

„Nei, það er ekki mín skoðun og mér finnst þetta mjög ábyrgðarlausar yfirlýsingar hjá bæjarstjóra Kópavogs, Ármanni Kr. Ólafssyni, að vaða í fjölmiðla með tölur sem ekki er búið að greina og engar ákvarðanir hafa verið teknar um breytingar á fjárhagsáætlun Kópavogsbæjar 2014. Það hafa ekki verið gerðar neinar kostnaðaráætlanir varðandi byggingu leiguíbúða á almennum markaði,“ segir Hjálmar.

Bygging fjölbýlishúsanna sé ekki hugsuð á kennitölu bæjarins heldur í samvinnu við leigufélög og bærinn kæmi að því með einhvers konar aðstoð.

En eitthvað kostar að kaupa íbúðir eins og tillagan gerir ráð fyrir líka?

„Já, á fjárhagsáætlun 2014 er gert ráð fyrir að kaupa 10 til 15 íbúðir. Ef keyptar yrðu 15 í viðbót þyrfti að taka lán fyrir því og þau lán sem bjóðast til kaupa á félagslegum íbúðum eru hagstæðustu lán sem eru í boði á markaðnum,“ segir Hjálmar.

Heildarkostnaðurinn sé nær 1,8 milljarði sem dreifist á nokkur ár og hafi ekki áhrif á fjárhag bæjarins á þessu ári. Ekki sé um pólitíst upphlaup að ræða heldur tillögu til að mæta miklum og vaxandi vanda í bænum.

Hjálmar telur að Gunnar Birgisson standa að heilindum á bak við tillöguna og vilja leysa þann vanda sem er í félagslegum húsnæðismálum.

„Ég lýsi yfir fullkomnu vantrausti á bæjarstjóra, hvernig hann hefur hegðað sér í þessum málum og farið fram í fjölmiðlum með óábyrgum hætti og fara með þetta mál í þetta lánshæfismatsfyrirtæki með þeim hætti sem hann gerði. Hann er einfaldlega að veita villandi upplýsingar til þessa fyrirtækis,“ segir Hjálmar Hjálmarsson.