Eiga von á barni: "Við erum auðvitað í skýjunum“

„Þetta var mikið stuð og fór eins og það átti að gera. Þetta var innflutningspartí og eiginlega fjögurra ára afmæli Bpro,“ segir Baldur Rafn Gylfason. Hann rekur heildsöluna Bpro ásamt sinni heittelskuðu, Sigrúnu Bender, og sérhæfa þau sig í hárvörum fyrir hársnyrtistofur. Þau Sigrún og Baldur blésu til teitis um helgina þar sem Bpro er nýflutt í Ögurhvarf en það var yfir nægu að skála í veislunni.

„Við höfðum yfir miklu að skála þetta kvöld. label.m er nú hægt að fá á nánast flestum betri og flottari stofum landsins. Svo erum við nýkomin frá London þar sem við tókum á móti tveimur viðskiptaverðlaunum frá label.m,“ segir Baldur. 

„Það var margt um manninn og giskum við á að um tvö hundruð manns hafi komið við hjá okkur. Það var frábært að horfa yfir hópinn því þarna voru flestir sem hafa hjálpað okkur í gegnum tíðina til að ná þangað sem við erum komin í dag,“ bætir hann við.

En Sigrún og Baldur geta glaðst yfir meiru en góðu gengi fyrirtækisins. Þau eiga nefnilega von á barni.

„Já, aðalgleðigjafann bíðum við reyndar með að hitta þar til sól fer að hækka aftur. Við erum auðvitað í skýjunum með það,“ segir Baldur.