Ljósmyndari og geðlæknir skrifa vísindaskáldsögu

Gísla Dúa Hjörleifssyni ljósmyndara og danska geðlækninum Mikkel Vossen Rasmussen varð vel til vina þegar þeir voru nágrannar í Árósum fyrir fimm árum. Í kjölfarið fóru þeir í ferðalag um Ísland þar sem Gísli Dúa var að viða að sér efni í ljósmyndabók.

„Hugmyndin að vísindaskáldsögunni The Lost Astronaut eða Týnda geimfaranum kviknaði á ferðalaginu. Við ákváðum að vinna frekar saman að bók, sem væri hvort tveggja ljósmyndabók og vísindaskáldsaga með geimfara og íslenska náttúru í aðalhlutverkum. Mikkel kom enda margt undarlega fyrir sjónir í ferðinni og hafði á orði að sér liði stundum eins og geimveru á Íslandi,“ segir Gísli Dúa. „Þess vegna er bókin næstum því sannsöguleg,“ bætir hann við.

Þótt Mikkel, höfundur sögunnar, skrifi á dönsku, kemur fyrsta prentun út í enskri þýðingu. Þeir félagar hafa verið með bókina í smíðum í fjögur ár og verkaskiptingin er skýr: Auk þess að taka ljósmyndirnar sinnir Gísli Dúi hvers kyns utanumhaldi; myndböndum, auglýsingum og því um líku. Mikkel er hins vegar höfundur sögunnar og jafnframt fyrirsæta Gísla Dúa. „Það kom sér vel að hann hafði fjárfest í grænum geimferðabúningi í Rússlandi löngu áður en vísindaskáldsagan varð að hugmynd. Hjálminn keyptum við hins vegar dýrum dómum á netinu,“ segir Gísli Dúa.

Hugmyndin að baki bókinni er m.a. sú að hún höfði til túrista, sem geti lesið söguna sér til ánægju og jafnframt gagns á ferðum sínum um landið. GPS-punktarnir við myndirnar eigi svo að leiðbeina þeim á söguslóðir. Til að eiga upp í útgáfukostnað leita Gísli Dúa og Mikkel styrktaraðila og áheita á síðunni Karolina Fund.