Edda Björgvins bregður sér í hlutverk Guðs

„Hún er fagmaður fram í fingurgóma. Við létum hana fá textann, hún las hann yfir þrisvar og negldi þetta,“ segir Auðunn Lúthersson, einn af höfundum og leikurum í sýningunni Heili hjarta typpi sem frumsýnd verður í Gaflaraleikhúsinu þann 24. október.

Auðunn skrifaði verkið með Ásgrími Gunnarssyni og leika þeir í sýningunni ásamt Gunnari Smára Jóhannessyni. Guð kemur við sögu í leikritinu og hreppti grínleikkonan Edda Björgvinsdóttir það hlutverk.

„Okkur vantaði einhvern með karisma Guðs og fórum að pæla í því sem grínhöfundar hver væri algjör goðsögn. Auðvitað var það Edda Björgvins sem býr yfir þessum ótrúlega persónuleika og er goðsögn í íslensku gríni og gamanleik. Hún var fullkominn Guð,“ segir Auðunn. Piltunum fannst sjálfsagt að Guð væri kona.

„Okkur fannst það vel við hæfi. Við spyrjum hana í leikritinu: Er Guð kona? Þá segir hún: Auðvitað er Guð kona.“

Sýningin Heili hjarta typpi verður frumsýnd, eins og áður segir, 24. október og fjallar um þrjár persónur - heila, hjarta og typpi, sem vinna að því að gera saman sýningu.

Post by Heili Hjarta Typpi.