„Hverskyns þöggunartilburðir eru hættulegir lýðræðinu“

IMMI, alþjóðleg stofnun um upplýsinga- og tjáningarfrelsi lýsir yfir þungum áhyggjum vegna óviðeigandi afskipta opinberra valdhafa af frjálsri umræðu í samfélaginu. Þetta kemur fram í fréttatilkynningu frá stofnuninni, en þar segir að borið hafi á slíku að undanförnu bæði í garð fjölmiðla og fræðasamfélagsins.

„Má þar nefna aukin pólitísk afskipti af RÚV sem og óeðlilega orðræðu þar um, tilraunir ráðuneytisstarfsmanna til að hafa áhrif á fréttaflutning um málefni sem varða ráðuneytin, ummæli um pólitíska krossfara í fræðasamfélaginu og tilmæli til auglýsenda um að sniðganga tiltekna fjölmiðla vegna efnislegrar umfjöllunar þeirra,“ segir í tilkynningunni.

Þá segir að fræðimenn og fjölmiðlar þurfi vissulega að þola málefnalega gagnrýni og ættu á engan hátt vera yfir slíkt hafnir. Þó verði fjölmiðlar að hafa svigrúm til að fjalla um stjórnsýsluna og kjörna fulltrúa og hvernig þeir fari með vald og hagi starfi sínu.

Fram hafi komið í dómum hæstaréttar að stjórnvöld og kjörnir fulltrúar verði að þola að gagnrýni sé beint að þeim þótt orðfæri kunni að vera hvasst, enda gegna fjölmiðlar mikilvægu aðhalds- eftirlits og upplýsingahlutverki.

„Tjáningarfrelsið er heilagt þeim sem hafa það að atvinnu sinni að veita stjórnvöldum aðhald og almenningi upplýsingar. Hverskyns þöggunartilburðir eru hættulegir lýðræðinu og IMMI hvetur eindregið til þess að þeir sem gegna opinberum áhrifastöðum virði frelsi og ritstjórnarlegt sjálfstæði fjölmiðla og akademískt frelsi fræðimanna,“ segir í tilkynningunni.