„Ég hef varla komist í fjárhúsin fyrir símanum“

„Hún er voðalega mikill leikari. Henni finnst ekkert leiðinlegt að fá athygli. Hún var samt smeyk um að þetta væri komið út í vitleysu hjá sér,“ segir Guðrún Smáradóttir. Hún er móðir Margrétar Veru Mánadóttur sem hélt því fram í Fréttablaðinu í dag að Richard O‘Brien, höfundur Rocky Horror, væri faðir hennar. Þessa dagana er Margrét einmitt að æfa fyrir sýninguna Rocky Horror, sem leikfélag Menntaskóla Borgarfjarðar setur upp.

Í samtali við ruv.is segir Margrét þetta vera uppspuna frá A til Ö. Móðir hennar segir í samtali við Vísi hafa vitað af uppátækinu.

„Hún var búin að segja mér að þetta stæði til. Mér fannst þetta bara fyndið,“ segir Guðrún og bætir við að það séu talsvert margir búnir að hringja í hana í dag út af greininni.

„Já, allir nema þessi pabbi hennar. Hann er ekki farinn að láta í sér heyra enn þá,“ segir Guðrún hlæjandi. „Þetta er bara búið að vera gaman í dag. Ég hef varla komist í fjárhúsin fyrir símanum.“

Guðrún segir að Margrét hafi líka látið föður sinn vita af þessu gríni sínu en aðspurð um hvort Margrét sé þekkt fyrir prakkaraskap segir hún eitthvað til í því.

„Það er mikið grín í henni. Vinkona mín sagði í morgun að hún hefði þetta frá mér.“

Margrét segir í frétt ruv.is hafa látið blaðamann Fréttablaðsins vita af því að saga hennar væri grín fyrr í dag. Samkvæmt heimildum Vísis er það ekki rétt. Freyr Bjarnason, umsjónarmaður innblaðs Fréttablaðsins, segir Margréti eiga framtíðina fyrir sér í markaðssetningu.

„Margrét Vera sýndi það í viðtalinu við Fréttablaðið að hún á framtíðina fyrir sér í markaðssetningu. Þetta er hress stelpa sem greinilega er tilbúin til að ganga mjög langt til að vekja athygli á sjálfri sér og sýningunni. Vissulega hefðum við átt að vanda vinnubrögð okkar betur en eftir stendur að vafalítið á eftir að verða uppselt á sýningu Rocky Horror í Menntaskóla Borgarfjarðar í allan vetur,“ segir hann.