Óli Geir, Sjomlatips og Beauty Tips safna fyrir Fjölskylduhjálp Íslands

„Ég sá að þessar tvær grúppur voru að safna peningum og langaði að láta gott af mér leiða með þeim," segir Óli Geir Jónsson, plötusnúður og eigandi fyrirtækisins Agent.is.

Óli Geir ætlar, í samstarfi við Facebook-hópana Beauty tips og Sjomlatips að standa fyrir söfnunarkvöldi á skemmtistaðnum Hendrix á laugardaginn. „Báðir hóparnir hafa verið rosalega duglegir við að safna peningum. Þeir hafa safnað fyrir Mæðrastyrksnefnd. Þeirra safnanir gengu yfirleitt þannig fyrir sig að fólk lagði inn á sameiginlegan reikning. En mér datt í hug að vinkla starfið mitt inn í söfnunina og gera það sem ég kann best; að halda partí. Við ætlum að safna fyrir Fjölskylduhjálp Íslands. Við viljum að allir geti átt góð jól, við viljum láta gott af okkur leiða," segir Óli Geir og bætir við, glaður í bragði:

„Við fengum aðstandendur skemmtistaðarins Hendrix með okkur í lið og þeir ætla að láta hluta af sölunni á barnum renna til góðgerðamála. Þetta verður því partí sem mun hafa góð áhrif á umhverfið, það verður enginn á bömmer eftir þetta kvöld. Þetta kvöld kemur líka á góðum tíma, margir eru að klára prófin og svona. Ég held að þetta verði bilað stuð."

Óli Geir býst við góðri mætingu þetta kvöld. „Þessar grúppur eru báðar mjög virkar. Í Sjomlatips eru tíu þúsund strákar, en ég er ekki með á hreinu hversu margir eru í Beauty Tips. En maður sér í Sjomlatips hversu mikil gagnkvæm virðing ríkir þar. Allir eru vinir, eru að skiptast á ráðum og skoðunum og ef einhver er með eitthvað bögg er honum bara hent út. Þessir hópar hafa verið að láta gott af sér leiða í samfélaginu og þetta er bara algjörlega til fyrirmyndar."

Stuðið hefst klukkan 11 á laugardagskvöld og stendur til fjögur. Sérstakar reglur verða á staðnum; ef lagið Sjomleh verður spilað verða fríir drykkir við barinn. Það lag verður tileinkað meðlimum Sjomlatips. Að sama skapi verður lagið Run The World með Beyoncé tileinkað stúlkunum í Beauty Tips og þá verða einnig gefnir drykkir, eins lengi og birgðir endast.

Aðgangseyrir er þúsund krónur og rennur allir ágóðinn til Fjölskylduhjálpar Íslands.