Bæjarfélagið viðurkennir gildi Sjálfstæðisfélagsins Munins í Vogum

„Þetta er hjákátlegt,“ segir Bergur Álfþórsson, bæjarfulltrúi E-listans, um tillögu í bæjarráði Voga um að sveitarfélagið geri samstarfssamning við Sjálfstæðisfélagið Muninn.

Það var Oddur Ragnar Þórðarson af H-lista, forseti bæjarstjórnar og formaður Munins, sem lagði fram drög að samstarfsamningnum en vék síðan af fundi. Samkvæmt samningnum ætti Muninn að fá aðgang að tveimur sölum í eigu bæjarins til að funda tólf sinnum á ári. Ákvæði er um að Sveitarfélagið Vogar viðurkenni „þjónustuhlutverk og gildi Munins í samfélaginu og Muninn hlutverk sitt og skyldur gagnvart íbúum“ í Vogum.

„Ég fæ ekki séð hvernig pólitísk samtök geta óskað eftir því að sveitarfélag viðurkenni þjónustuhlutverk og gildi pólitísks félags,“ segir Bergur Álfþórsson, sem óskaði eftir skýringum á þessu atriði og fleirum.

 

Óviðeigandi segir samstarfsmaður

„Það verður mjög spennandi að sjá hvort formaður Sjálfstæðisfélagsins getur komið með svar við því hvernig það þjónar hagsmunum íbúa sveitarfélagsins að hann fari á landsfund Sjálfstæðisflokksins,“ bætir Bergur við en ákvæði um þessa fundarsókn er einmitt í samningnum.

Meirihluti í bæjarstjórn Voga er myndaður af þremur fulltrúum H-lista og einum fulltrúa L-lista. Sá er Kristinn Björgvinsson. Á bæjarráðsfundinum sagði Kristinn „óviðeigandi að sveitarfélagið geri samstarfssamninga við stjórnmálasamtök“.

Vill ýta undir menningarleg gildi

Oddur kveðst ekki bjartsýnn á framgang málsins eftir umræðuna í bæjarráði.

„Þeim sem sátu þennan fund fannst þetta eitthvað óþægilegt. Hugsanlega tengist það því að það eru kosningar eftir örfáa mánuði. Ég sé ekki grundvöll fyrir því að ná þessu í gegn þegar þessir menn láta svona,“ segir Oddur sem bendir á að sveitarfélagið geri einmitt samstarfssamninga við ýmis önnur félög:

„Svona starfsemi ýtir undir pólitísk, menningarleg og félagsleg gildi. Tilgangurinn er að draga inn máttarstólpa og áhugaverða karaktera í þjóðfélaginu til að ræða málin ítarlega.“