Kraftaverk að ökuníðingur skyldi ekki slasa neinn

Ofsaakstri ökumanns, undir áhrifum fíkniefna, lauk á Vesturlandsvegi við Álafosskvosina um tvö leytið í nótt þar sem lögreglan gerði honum fyrirsát. Þykir það ganga kraftaverki næst að hann skuli ekki hafa unnið öðrum vegfarendum skaða með athæfinu.

Upphaflega ætlaði að lögreglan að stöðva manninn í Kúagerði á Reykjanesbraaut vegna ábendinga um að hann væri undir áhrifum. Hann sinnti ekki stöðvunarmerkjum heldur jók hraðann og braut fjölmargar umferðarreglur.

Um tíma ók hann á öfugum  vegarhelmingi á móti umferð. Hann ók í gegn um Hafnarfjörð, Kópavog og inn í Reykjavík og var kominn í Mosfellsbæ þegar hann var loks stöðvaður. Hann var fyrst fluttur á slysadeild til skoðunar og blóðsýnatöku og síðan vistaður í fangageymslu.