Albertína tekur ekki sæti á lista Framsóknarflokksins

Albertína Elíasdóttir, oddviti Framsóknarflokksins í Ísafjarðarbæ, mun ekki taka sæti á lista flokksins í bæjarstjórnarkosningunum í vor en frá þessu er greint á vefsíðu Bæjarins Besta.

Albertína mun hafa tilkynnt formanni uppstillingarnefnd um ákvörðun sína.

„Ég hef velt þessu fyrir mér lengi og þetta er niðurstaðan,“ segir Albertína í samtali við BB.

Fram kemur í frétt BB að það hafi ekki verið leyndarmál að Albertína hafi ekki gengið í takti með núverandi forystu flokksins. Hún segir að það eigi þátt í ákvörðun sinni.

„Að einhverju leyti er þetta óánægja með flokkinn á landsvísu en ekki með félagið hér heima og fólkið sem ég hef starfað með. Þetta var erfið ákvörðun því mér þykir vænt um félaga mína í Framsóknarfélagi Ísafjarðarbæjar. Þetta var ekki skyndiákvörðun og ekki ákvörðun sem er tekin í fýlu.“

Albertínu hefur verið orðuð við önnur framboð í vor og þá mögulega að setjast á lista Bjartrar framtíðar en ekki hefur verið staðfest hvort flokkurinn ætli að bjóða fram í Ísafjarðarbæ.

„Ég get ekki neitað því að það hefur verið haft samband við mig úr ólíkum áttum en það er ekki neitt í kortunum. Ég hef mikinn metnað til að starfa fyrir sveitarfélagið mitt og það hefur ekki breyst.“ Albertína hefur setið í bæjarstjórn síðan 2010 og er forseti bæjarstjórnar.