Stefán mun hætta sem rektor við Háskólann á Akureyri

Stefán B. Sigurðsson, rektor Háskólans á Akureyri, hefur tekið þá ákvörðun að sækjast ekki eftir starfi rektors áfram en frá þessu er greint á vefsíðu Akureyri vikublað.

Stefán mun hætta sem rektor þann 1. júlí þegar ráðningatími hans rennur út.

„Að vel íhuguðu máli hef ég tekið þá ákvörðun að sækjast ekki eftir endurnýjun stöðu minnar sem rektor. Nú í apríl verð ég 66 ára og gæti því setið að hámarki rúm þrjú og hálft ár til viðbótar. Ég mun þó starfa áfram við Háskólann á Akureyri og sinna kennslu og rannsóknastörfum,“ segir í bréfi rektors.