Golfarar með sleggjur, slaghamra og járnkarla

Golfarar á Íslandi hafa þungar áhyggjur af því að golfvellir verði vart nothæfir ef fram fer sem horfir; að kalskemmdir verði verulegar en klakabrynja hylur nú mörg tún.

Stjórn golfklúbbsins Setberg ætlar að grípa til aðgerða í dag og metur það svo að nú sé færi. „Við höfum eins og aðrir klúbbar verið að berjast við klaka á flötunum í vetur. Staðan er þannig núna að klaki hylur að mestu 4., 5., 6. og 8. flöt,“ segir í tilkynningu sem stjórn klúbbsins hefur sent út á félaga. „Klakinn er þó búinn að minnka það mikið á þessum flötum að það er orðið raunhæft að brjóta hann af. Við ætlum því að prófa og sjá hvað við getum gert á tveimur tímum í dag.“

Stjórnin sendir út herkvaðningu, segir að þeim mun fleiri sem mæti, þeim mun betur muni verkið sækjast. Allir eru hvattir til að mæta með sleggju, slaghamar eða járnkarl og bent er á að mikilvægt sé að mæta á gormum/göddum svo félagar hrasi ekki á ísnum.